ໃນງານພິທີເຊັນສັນຍາ, ທ່ານ ໄຊສົງຄາມ ມະໂນທັມ ໄດ້ກ່າວວ່າ: “ ວຽກງານ ຄຸ້ມຄອງຍານ ພາຫະນະ ເປັນວຽກງານໜຶ່ງທີ່ສຳຄັນ ຂອງຂະແໜງໂຍທາທິການ ແລະ ຂົນສົ່ງ ແລະ ຕິດພັນກັບຊີວິດ ປະຈຳວັນ ຂອງສັງຄົມທີ່ນຳໃຊ້ຍານພາຫະນະ ເພື່ອເຮັດການຜະລິດ, ໄປມາຫາສູ່, ທ່ອງທ່ຽວ ແລະ ຈຸດປະສົງອື່ນໆ ໃຫ້ມີຄວາມສະດວກ ປອດໄພ ແລະ ເປັນມິດຕໍ່ສິ່ງອວດລ້ອມ. ໄລຍະຜ່ານມາ ພວກເຮົາ ກໍເຮັດຫຼາກຫຼາຍຢ່າງ ໂດຍນໍາໃຊ້ ນິຕິກຳ ແລະ ເຄື່ອງມື ອຸປະກອນ ເທົ່າທີ່ມີ ແຕ່ຫາກທຽບກັບຫລາຍ ປະເທດໃນພາກພື້ນ ແລະ ສາກົນແລ້ວ ເຫັນວ່າ ຍັງບໍ່ທັນສະໄໝເທົ່າທີ່ຄວນ. ນອກຈາກນັ້ນ, ກໍມີຄວາມ ຈຳເປັນໃນການເຊື່ອມໂຍງ-ເຊື່ອມຈອດ ກັບພາກພື້ນນຳດ້ວຍ. ດັ່ງນັ້ນ, ສປປ ລາວ ໃນນາມສະມາຊິກອາ ຊຽນ ພາຍຫລັງທີ່ໄດ້ລົງນາມເປັນພາຄີ ສັນຍາການຮັບຮູ້ມາດຕະຖານເຕັກນິກ ເຊິ່ງກັນ ແລະ ກັນ ຂອງ ອາຊຽນ (ASEAN Mutual Recognition Agreement “MRA”) ພວກເຮົາກໍໄດ້ອອກກົດໝາຍ ວ່າດ້ວຍຍານພາຫະນະທາງບົກ ໃນປີ 2021 ພ້ອມກັນນັ້ນ ກໍໄດ້ສ້າງ ແລະ ປັບປຸງ ນິຕິກຳລຸ່ມ ກົດໝາຍອີກຫລາຍສະບັບ. ໜຶ່ງໃນຫົວໃຈສຳຄັນຂອງກົດໝາຍ ແມ່ນໄດ້ກຳນົດໃຫ້ ສປປ ລາວ ຕ້ອງມີ ສູນທົດສອບຍານພາຫະນະທາງບົກ ຫລື Testing Center ທີ່ນຳໃຊ້ເຄື່ອງມື ອຸປະກອນ ທີ່ທັນສະໄໝ ໄດ້ມາດຕະຖານສາກົນ ຊຶ່ງກະຊວງ ຍທຂ ເວົ້າລວມ, ເວົ້າສະເພາະ ກົມຂົນສົ່ງ ກໍໄດ້ພະຍາຍາມຂົນ ຂວາຍທຶນຮອນ ແລະ ນັກລົງທຶນທີ່ມີຄວາມຮູ້ ຄວາມສາມາດ ທາງດ້ານນີ້ມາຫລາຍປີ ແຕ່ກໍມີຄວາມ ຫຍຸ້ງຍາກ ເນື່ອງຈາກວ່າເປັນກິດຈະການທຸລະກິດ ທີ່ບໍ່ໄດ້ສ້າງຜົນກຳໄລຫຍັງຫລວງຫລາຍ ແຕ່ກໍຍັງ ໂຊກດີທີ່ລັດຖະບານ ສປ ຈີນ ໄດ້ໃຫ້ທຶນຊ່ວຍເຫລືອລ້າຜ່ານໂຄງການຮ່ວມມື ແມ່ນ້ຳຂອງ-ແມ່ນ້ຳລ້ານ ຊ້າງ ເພື່ອສຶກສາໃນເບື້ອງຕົ້ນ.